اخويا

منهارة، كنت هتجنن من جوايا ومش عارفة أيه اللي يخليها تعمل كل ده وليه، جوزي حاول يرجعني مقدرتش، قولتله شرطي الوحيد إن الإنسانة دي تختفي، تروح مكان بعيد عن هنا، مش هقدر أحس بالأمان وهي موجودة معايا وفي نفس البيت..

وفعلًا بعد أسبوع كانت أجرت شقة بعيد وجوزي تكفل بيها رغم إنه مكنش طايقها وقرر إنه يرجعني عشان نعيش مع بعض، حمدت ربنا إني أخيرًا اتخلصت منها ويادوب بدأت أحس بالأمان من جوايا، وعرفت إن جوزي طلب ميراثه كله لأنه كان مضحي لواحدة متستاهلش، وحسيت يمكن ده نوع من أنواع العدل لأنها فعلًا متستاهلش، بس واضح إن التمثلية مكملتش للنهاية بسبب الجشع وبسبب إن الخبر انتشر إن جوزي خد مبلغ كبير من أخته بعد ما كان سايبه ليها..

أنا اللي دبرت كل ده، بكرهها من زمان من أيام ما أمها وأبوها رفضوني، كنت بتمنى يموتوا في كل لحظة وسبحان الله اتحققت أمنيتي وماتوا، وفضلت وراه لحد ما خطبني واتجوزني، كنت كل ما بشوفها بفتكر أبوها وأمها اللي كانوا شايفين حقيقتي ورافضيني، وكنت مقهورة إن كل فلوس الوِرث تروحلها وعايزة أرجع فلوسي وفلوس جوزي، عشان كدا عملت الخطة بالكامل، ماسك للقدم عامل زي الشراب يبان كأنه حقيقي وتظهر فيه الالتهابات، ازازة بتطلع ريحة وحشة كنت برشها عليا كل شوية وسط أزايز البرفان، وتمثلية إني بشوف حاجات في الشقة، والدكتور والعطار ناس أعرفهم وقالوا اللي قولته بالظبط، وكملت صاحبتي الموضوع لما

قالت إنها شافت أخت جوزي عند الدجال.. وفعلًا أخوها طردها وخد فلوسه وكل حاجة مشيت زي الفُل، لولا إنهم عرفوا إني معايا فلوس كتير، وطلبوا نص الفلوس، اللي كانوا تقريبا 200 ألف، ولما قولت استحالة طلبوا مني أسرقها، وجوزي هيشك في أخته مش فيا، وزي ما اتظلمت مرة تتظلم تاني، لكني فشلت في السرقة، فشلت تمامًا، ولما سحبوا مني كل ما أملك وحتى شبكتي قرروا يتخلصوا مني ويحكوا لجوزي كل حاجة، ورجع يومها ثاير، وقدام غضبه ظهرت لعبتي كلها، وزي ما دخلت البيت خرجت منه مطرودة بالعفش بتاعي في الشارع وبفضيحة شهد عليها كل أهل المنطقة..

أنا اللي فضلت أرخص من نفسي وأجري وراهم يوم واتنين وشهر وسنة عشان يتجوزني، رفضوني وفرضت نفسي عليهم، ولما اتجوزت بدل ما أتهد واسكت لا أذيت البنت من أول يوم عشان أسيطر على أخوها سيطرة كاملة، بس واضح تمامًا إن كلمة (حسبي الله ونعم الوكيل) بتوصل لسابع سما، وواضح تمامًا إنها استحالة أن لا تُقبل، ولو الظالم عاش شوية متهني فبيكون تدبير ربنا قرب أوي وبيترد الظُلم بصورة قاسية أوي، صورة متمنهاش لأي حد إطلاقًا..
بقلم: أحمد محمود شرقاوي
………………

……………….
متنساش لو عجبتك القصة تعمل لاف وتعليق برأيك في كومنت.. ومتنساش تمنشن أقرب صديق لك عشان يتابع معانا القصة أو تشاركها مع أصحابك.. وفولو لصفحتي الشخصية لو أول مرة تتابعني عشان يوصلك كل جديد.. بقلم: أحمد محمود شرقاوي