من شوية شوفت واحدة صاحبتي عند الصاغة بالصُدفة البحتة وكمان شوفتها بتنقي في الغوايش والخواتم، استغربت جدا ووقفت بعيد أراقبها وأشوفها بتعمل ايه، وده ببساطة لأنها أكتر انسانة بتدعي الفقر في الدنيا، بل وفي أغلب الأوقات إما بتستلف مني فلوس أو أكل وشُرب، وبنفضل نتكلم بالساعات عن حالتها التعبانة وجوزها البخيل وحياتها القاسية معاه، لدرجة إني من كتر ما كنت بشفق عليها كنت بطلب منها تطلق منه، عشان كدا كنت مستغربة وبغلي من جوايا تكون بتشتري الدهب ده لنفسها.
وفعلا لقتها خرجت بشنطة صغيرة مكتوب عليها اسم الصاغة، طلعت موبايلي وصورتها عشان أواجهها لما أشوفها وبعدين سبتها ومشيت، ورجعت بيتي وانا مخنوقة أوي وعمالة أفتكر معرفتنا القديمة ببعض كانت عاملة ازاي وازاي اتعرفت عليها من الأساس. صاحبتي نرمين هي اللي طلعت بيها من الدنيا وتعتبر أقرب صاحبة ليا من يوم ما دخلت المدرسة، كل المصايب اللي عملتها كانت هي بطلتها بدون تفكير، وحتى أول مرة أصاحب فيها ولد كان بتخطيط منها كمان.
ومش هنسى أكبر كا رثة عملتها في حياتي لما عملت علاقة محر مة مع شاب وانا مخطوبة وحد صورني وهد دن ي انه هيبعت الصور لخطيبي، ويومها نرمين قدرت توقعه وتكشف شخصيته وتمسك عليه صور وتخرجني من المصيبة دي. ببساطة كانت هي صاحبة السوء في كل حاجة، بس في نفس الوقت كانت هي الصاحبة اللي مقدرتش أتخلى عنها في حياتي، عشان كدا كنت مقهورة من انها بقالها سنين بتوهمني بحاجة وهي عايشة عكسها.
غيرت هدومي ولقيت جوزي باعتلي انه خلاص قرب ينزل أجازة من شغله اللي استمر 6 شهور كاملين، معرفش ليه محستش بأي فرحة من جوايا لما قالي انه راجع، يمكن لأني اتجوزته وانا مغصوبة، ولا يمكن لأني عايشة زي المطلقة بالظبط وبشوف جوزي أيام معدودة كل كام شهر، ومن جوايا كنت مستنية أي حاجة تخرجني من اللي انا فيه وأبطل تفكير.
شوية ولقيت نرمين بتتصل، اتحفزت جدا ورديت عليها ردود مستفزة لحد ما كنت هجننها وفضلت تسأل عن سبب طريقة كلامي ده، وفي النهاية قولتلها إني مش هتكلم غير لما تلبس وتجيلي بنفسها، ورغم انها استغربت بس كلها ساعة ولقتها قدامي واقفة تبصلي بتحفز شديد، استقبلتها ببرود وواجهتها بكل حاجة، حاولت تفهمني إنها كانت بتشتري ده لحد تاني بس معرفتش تكذب قدامي إطلاقا، وفي النهاية اعترفت قدامي وقالتلي إنها حملت تطبيق مراهنات وكسبت منه مبلغ كويس وراحت اشترت حتة دهب وخبتها عشان جوزها مياخدش باله انها معاها فلوس.
سألتها هي ليه معرفتنيش بما اننا صحاب وبنقول كل حاجة لبعض، قالتلي لأني هقول ان ده حرام وهعمل فيها شيخة، وناس كتير قالوا إن ده حلال مش حرام، ونهينا القعدة ومشيت وانا من جوايا دماغي هتولع، بقا الفقيرة اللي مش لاقية تاكل بقت بتدخل الصاغة وتحوش دهب، وانا المرتاحة ماديا مش عارفة أشتري حتة دهب واحدة، عشان كدا طلبت منها بالليل تبعتلي التطبيق من باب التجربة وقولتلها إني مش هجرب طبعا، بس سمعت ضحكتها الخبيثة اللي كانت بتأكد انها عارفة إني هجرب، شوفت أكتر من بلوجر بيحكي عن التطبيق وان كله قايم على الحظ وسهل أوي تسحب فلوسك عن طريق فودافون
كاش ومش محتاج حتى حساب بنكي. وقد كان، دخلت أول مراهنة ليا على 200 جنيه وخسرتها، وجالي وقتها احساس شديد بالغضب، وبقيت كل اللي عاوزاه إني أعوض خسارتي وبس، حطيت 200 جنيه كمان وكانت المفاجأة لما كسبت الف جنيه. في لحظة بقا معايا 800 جنيه مكسب، سحبت الفلوس على محفظتي الكاش وطلبت أوردر أكل غالي وطلبت شوز من على النت، ولأول مرة أبقا منتشية وفرحانة أوي كدا.
ومن يومها بقا التطبيق هو حياتي، وكل مراهناتي عليه 100 جنيه، 200 جنيه، مكنتش بزود، ودايما كنت بكسب رغم خسارتي المتكررة، لحد ما بدأ التطبيق يفتحلي روم أكبر، وبقا مسموح أدخل مراهنات على عشرة وعشرين ألف.
في الفترة دي رجع جوزي من السفر وبقيت مضطرة أبعد عن التطبيق خالص عشان مياخدش باله، بس من جوايا كانت بتلح عليا فكرة الرهان الكبير، أدفع ولو 20 الف جنيه مثلا، لأنها هتبقا ضربة كبيرة أوي فيها 200 الف مثلا هشتري بيهم دهب كويس أوي.
وفضلت أفكر وأفكر لحد ما الشيطان كبر الفكرة في دماغي، جوزي كان راجع من السفر ومعاه تقريبا 60 الف جنيه، وكان حاططهم في الدولاب، وبدأ شكل الفلوس يغريني أوي، واتخيل اني دخلت رهان كبير وكسبته، وروحت نفس الصاغة واشتريت دهب أكتر من صاحبتي.
وبعد تفكير طويل سرقت منهم 30 الف جنيه، وفتحت شباك الشقة في نص الليل ورجعت نمت، وصحيت تاني يوم على جوزي وهو مخضوض وبيسألني عن الفلوس، طبعا مثلت المفاجأة واني معرفش عنها حاجة، وسبته وهو هيتجنن وراح عمل محضر، ورغم إني كنت حاطة إيدي على قلبي إلا إن الموضوع عدى في النهاية، واستعوض جوزي المبلغ، وفورا روحت حطيته على المحفظة وبدأت أدخل روم الرهان على 10 الاف جنيه.
وفي أول مراهنة خسرت، حاولت تاني وخسرت، في دقايق خسرت 20 الف جنيه، مش مهم كدا كدا مش من فلوسي، بس لازم أجرب مرة تالتة، وفي المرة دي كسبت، ولقيت مرة واحدة معايا 100 الف جنيه، صرخت من الفرحة، مكنتش مصدقة، وقفت طمعي وجريت أسحب الفلوس.
بس جتلي رسالة مفاجأة إن الحد الأقصى للتعاملات الشهرية في محفظتي انتهى ولازم أستنا لآخر الشهر، اللي هو بعد 15 يوم كاملين، كنت هتجنن، وعاوزة أتصرف في أسرع وقت، خاصة إن ظهر قدامي بوست على جروب التطبيق بيقول إن التطبيق هيقفل وياخد كل فلوس الناس، وزي المجنونة كلمت صاحبتي تديني رقم محفظتها عشان أحول عليها الفلوس وليها مني 5 الاف جنيه.
مش مهم خسارة بسيطة لأني كنت مرعوبة على فلوسي كلها، وفعلا سجلت برقمها وجتلي الرسالة اللي طربت قلبي.
(تم تحويل مبلغ 100.000.00 إلى حساب رقم …..) وطرت من الفرحة، وقبل ما أكلم صاحبتي لقتها بعتتلي وبتقولي مفيش حاجة وصلت، قلبي اتقبض وقولتلها تتأكد، دخلت اتأكدت ورجعت قالتلي ان الفلوس متعلقة، نزلت بوست على الجروب وكل التعليقات أكدت ان مفيش حاجة اسمها الفلوس اتعلقت، وحد اتواصل معايا خاص وقالي صاحبتك بتعمل حوار عشان تاخدهم، واجهتها وشبه اتخانقت معاها لقتها بعتتلي سكرين شوت برصيد محفظتها وكان مبلغ صغير، بس عادي ممكن تكون حولت الفلوس على حد تاني، قولتلها إني هفضحها واقلب الدنيا عليها، قالتلي بكل برود:
(افضحيني وانا هقول لجوزك انك سرقتي منه 30 الف زي ما حكيتي معايا، ولا انتي كنتي ناوية ترجعيهم، ولو فتحتي بقك هتزعلي)
وقعدت منهارة، جوزي مشي يومها وانا مكنتش قادرة أهمس بنص كلمة، لدرجة إني خفت أنام تجيلي جلطة من القهر، وبدأت أخطط عشان أخد حقي منها بأي طريقة، وكان لازم الأذى يجي في أقرب حاجة ليها، جوزها اللي بتشتكي منه ومن فقره بس بتموت فيه، وبدأت أرسم الخطة عشان يقع، كنت عاوزاه يطلقها بأي طريقة مهما كان، وبعتله مرة واتنين وفضلت شهر كامل وراه لحد ما استسلم تماما وقامت بينا علاقة شيطانية، علاقة قادرة ترمينا في نار جهنم، بس دي كانت آخر حاجة أنا ممكن افكر فيها دلوقتي، وبعد خيانة كاملة لمدة 4 شهور وبعد ما افتكرت انه بقا بيموت فيا طلبت
منه في النهاية يطلقها وانا اتطلق ونتجوز. وكان الرد القاسي، الرد اللي قال فيه انه بيحبها ولو طلبت منه ده تاني هيرميني ومش هيجيلي تاني، وقتها لو سرقتها ليا خلتني أولع قيراط فانا حاليا ولعت 24 قيراط، يعني تسرقني وجوزها جمبها وبيحبها كمان، وبدأ الشيطان يلعب في دماغي أكتر وأكتر. كلمته واعتذرت ورتبنا مقابلة جديدة في شقتي، شوية سم في الأكل وخلصت عليه تماما، هخليها تتقهر قهرة السنين على جوزها، قطعت الجثة نصين وفي نص الليل روحت رميت كل حتة في صندوق زبالة مختلف.
بس كلها أيام ولقيت قوة من الشرطة بتقبض عليا، طبعا لقوا الجثة، اتعرفوا عليها، مراته اتهمتني بعد ما فتحت الواتس آب بتاعه من على الجهاز واكتشفت رسايلنا، كاميرات المراقبة كشفتني وانا طالعة في نص الليل بشوال ضخم، وبقيت منتظرة الموت على حبل المشنقة خلال أيام بسيطة.
الفلوس الحرام، هي الفلوس الحرام، عاملة زي السرطان، هتنهش في حياتك كلها، روحك ونفسك وفلوسك وأهلك، هتدمر كل حاجة، هتخليك عايش في جحيم، جحيم اسمه الفلوس الحرام، والتطبيقات دي محرمة وعقابها شديد للي هيدخلها، واللي هيتربح منها، وانا انسانة استسهلت الحرام زمان وعملت علاقة وربنا سترني، ودلوقتي دخلت أعمل علاقة أكبر بسبب الانتقام، ودي للأسف كانت نهايتي.
بقلم:
أحمد محمود شرقاوي
…………
لو عندك أي حكاية غريبة أو مخيفة حصلت معاك أو مع حد تعرفه وعاوزني أكتب عنها في قصة بكرة كل اللي عليك إنك تبعتلي على الخاص على أكاونت أحمد محمود شرقاوي كل اللي تعرفه عن الحكاية أو الموقف المخيف ده بدون استئذان وتأكد اني هشوف رسالتك بأمر الله..
بقلم: أحمد محمود شرقاوي
……….
متنساش لو عجبتك القصة تعمل لاف وتعليق برأيك في كومنت.. ومتنساش تمنشن أقرب صديق لك عشان يتابع معانا القصة أو تشاركها مع أصحابك..
وفولو لصفحتي الشخصية لو أول مرة تتابعني عشان يوصلك كل جديد.. بقلم: أحمد محمود شرقاوي
