أمي كانت من النوع اللي بتربي أرانب فوق السطوح وتبيعهم عشان نقدر نعيش من تمنهم، وكمان كانت بتبيع خضار قدام البيت وشوية شيبسي وحلويات وكل حاجة في مقدرتها انها تبيعها عشان نعيش مستورين وسط الناس، وده لأن ومع الأسف أبويا زي رجالة كتير أوي طلع راجل ندل وهجرنا من سنين طويلة، وحكتلي أمي حكايات عنه تخليني أكرهه وأتمنى إنه يكون مات عشان مشوفش وشه مرة تانية أبدا.
وكبرت واحدة واحدة واشتغلت مع أمي في الشغلانة اللي منعرفش غيرها، اللي عايزة خضار نبيعلها، ندبح الأرانب ونجهزها للناس، نبيع حلويات للعيال وهما رايحين المدرسة، وهكذا، لحد ما طلعت في مرة لقيت جوز أرانب ميتين، نزلت بلغت أمي بالخبر لقيت وشها اسود وقالت أكيد دي عين الست أم سيد ربنا ياخدها، قولتلها هروح أرمي الأرانب الميتة قالتلي لا سيبيهم وانا هرميهم ومالكيش دعوة بيهم..
وبعد ساعتين بس الأرانب كانت اختفت، سألت أمي عليهم قالتلي انها رمتهم، استغربت أوي لأنها مخرجتش من البيت من الأساس، شوية وناس خدوا مننا أرانب جاهزة ومتنضفة ومشيوا.
بس بعد أيام مات جوز تانيين، وبلغت أمي بالخبر، بس وقتها مزعلتش ولا علقت، وشوفتها بتدبحهم في المستخبي وتنضفهم وتبيعهم كأنهم أرانب صاحيين، واجهتها باللي بتعمله قالتلي لو نطقت بنص كلمة هترميني في الشارع، ده جوز الأرانب ب٢٠٠ جنيه، فيه حد عاقل يرمي ٢٠٠ جنيه في الشارع..
ومع الوقت بدأت الاحظ حاجة تانية على أمي، أمي كانت بتغش في الميزان، توزن كيلو الطماطم وبعدها تنقص منه اتنين، تحط اوقات حتة عجينة في ضهر كفة الميزان عشان تنقص في الوزن، كانت بتبيع للعيال شيبسي منتهي الصلاحية، ولما حاولت أقولها إن ده غلط وحرام طلبت مني متدخلش في أي حاجة هي بتعملها..
بس ده ممنعش إن الأرانب بقت بتموت بطريقة غريبة وشبه يوميا، بس أمي مكانتش بتضايق لأنها لقت الحل عادي جدا، تدبح الميتين وتبيعهم، بس مع الوقت أكتر من زبونة اشتكت إن طعم لحم الأرنب غريب، وطلع كلام في المنطقة اننا مش كويسين وأكتر من زبونة بقوا بيشتروا من مكان تاني، وده كان إنذار عشان أمي توقف اللي بتعمله ده وإلا هنخسر أهم شغل بالنسبالنا وأكتر حاجة بتكسب وهي الأرانب..
عشان كدا وقفت دبح الأرانب الميتة، وده خلانا نخسر أكتر لأننا ويوميا بقينا بنرمي أرنب واتنين، وبقينا بنرميه قدام الناس عشان حاجتين، أولا المصداقية عشان الناس يقولوا اننا بندبح الصاحي بس، وثانيا عشان العين تهدى علينا شوية ونوري الناس اننا بنخسر مش بنكسب، بس الموضوع زاد عن حده، وبقت أمي هتتجنن..
