7 مرات خلال شهر كامل وديتها وبقيت استناها ساعة كاملة ونرجع البيت بدون ولا كلمة، مكنتش بعرف أبص في عنيها أبدًا، كنت حاسس إني بتحول لمسخ، بس الغريب إنها بقت كويسة جدًا، شهر كامل ورجعت أسوأ مِن الأول، كوابيس، دم بينزل منها كل شوية، وبقت بتحصلها نوبات صـ,ـرع وينطق عليها جن كمان. روحت للشيخ وأنا ناوي أدبحه، قولتله إنه كذب عليا عشان ينال مِنها وإنه معالجهاش، قالي أنا معايا الحل الأخير، خليها تشرب المية دي وأوعدك إنها هتبقا تمام، وصدقته للمرة التالتة وخلتها تشرب المية اللي قال عليها.
وبعد يومين بس صحيت على ألم بشع، رهيب، كانت مراتي فوق مني وبتطعن فيا بالسكينة في كتفي، ولولا إني زقتها عَني كانت طعنتني في رقبتي خلصت عليا، قمت وأنا غرقان في دمي عشان اتفاجئ بابني الرضيع مدبوح جمب مني وساكن الحركة، قمت أصرخ في البيت عشان أهلي يصحوا بس مراتي كانت هربت مِن البيت كله واختفت. ابني اتدبح، وأنا الطعنة قطعتلي الأوتار في كتفي وعملتلي حالة شلل في كتفي فضلت شهر بتعالج مِنها ومقدرتش، ومراتي اختفت ومحدش قدر يوصل لمكانها مرة تانية أبدًا.
لحد ما لاقيت ورقة، ورقة مكتوبة بخط إيديها بتحكيلي فيها كل اللي حصل، بتقولي إنه بعد المشاكل اللي حصلت في بلدها بنات كتير راحوا لعرافة تعملهم أعمال عشان شباب مِن بلاد تانية يحبوهم وياخدوهم في بلدهم، وكان يكفي العمل مجرد صورة. عشان كدا تساهلت معايا بالكلام وطلبت صورتي، ولما بعتلها صورتي اديتها للعرافة وسحرتني، خلتني أحبها ومستعد أضحي بأي حاجة في الدنيا عشانها، وطلبت أتجوزها رغم كل المخاطر مِن الجوازة دي.
ولما جت بلدنا اتعملها سحر بالضرر، أو سحر عكسي، وأكيد مِن واحدة مِن زوجات أخواتي أو واحدة حاقدة عليها مِن أهل البلد، واجتمع سحرين في البيت، سحر المحبة بينا وسحر التفريق، وده اللي خلاها تتعب أوي كدا الفترة دي، ولما روحنا للشيخ عرف إنها عملتلي سحر بالمحبة وساومها إما العلاقة أو يقولي ويخليني أطلقها، ووافقت بالعلاقة مع الشيخ وأنا برة معرفش أي حاجة.
